Isa 27 | NdeIBE | STEP | Ngalolosuku, uJehova uzajezisa ngenkemba yakhe, inkemba yakhe eyesabekayo, enkulu elamandla, uLeviyathani inyoka endizayo, uLeviyathini inyoka egoqanayo; uzayibulala inunu yasolwandle.

Isaiah 27

Ukukhululwa kuka-Israyeli

1 Ngalolosuku, uJehova uzajezisa ngenkemba yakhe, inkemba yakhe eyesabekayo, enkulu elamandla, uLeviyathani inyoka endizayo, uLeviyathini inyoka egoqanayo; uzayibulala inunu yasolwandle.

2 Ngalolosuku – “Hlabelani ngesivini esithela izithelo.

3 Mina, uJehova, ngiyasilinda; ngiyasithelezela kokuphela. Ngisilinda emini lebusuku ukuze kungabi khona owenza okubi kuso.

4 Angithukuthelanga. Sengathi kungabe kulokhula lameva okumelana lami! Bengizakulanda ngilwe lakho empini; bengizakutshisa konke ngomlilo.

5 Loba phela kabeze bazephephela kimi; kabenze ukuthula lami, Ye, kabenze ukuthula lami.”

6 Ezinsukwini ezizayo uJakhobe uzagxila, u-Israyeli uzahluma akhahlele agcwalise umhlaba wonke ngezithelo.

7 UJehova usemtshayile na njengokutshaya kwakhe abamtshayayo? Usebulewe na njengokubulawa kwalabo abambulalayo?

8 Ngempi langokumxotsha elizweni ulwe laye – ngesiphepho sakhe esesabekayo umsusela phandle, njengamhla kuvunguza umoya wasempumalanga.

9 Ngalokhu-ke ukona kukaJakhobe kuzahlawulelwa, njalo lokhu kuzakuba yisithelo esigcweleyo esokususwa kwesono sakhe: Lapho esenza wonke amatshe e-alithare abe njengamatshe ekalaga avuthuzwe izicucu, akulazinsika zika-Ashera kumbe ama-alithare empepha azatshiywa emi.

10 Idolobho elivikelweyo libhidlikile, indawo yokuhlala etshiyiweyo, yadelwa njengenkangala; lapho asesidla khona amathole lapho alala khona phansi; ahlubula izingatsha zalo zisale zize.

11 Lapho izingatsha zalo sezomile, ziyephulwa kuze abesifazana babase umlilo ngazo. Ngoba laba ngabantu abangelakuzwisisa; ngakho uMenzi wabo kalasihawu kubo, loMdali wabo akayikuba lomusa kubo.

12 Ngalolosuku uJehova uzabhula kusukela kuYufrathe ogelezayo kusiya eMhotsheni waseGibhithe, njalo lina abako-Israyeli lizabuthwa munye ngamunye. 13 Njalo ngalolusuku kuzakhaliswa icilongo elikhulu. Labo ababelahlekele elizweni lase-Asiriya lababexotshelwe elizweni laseGibhithe bazabuya bakhonze uJehova phezu kwentaba engcwele eJerusalema.